Lagt er af stað frá Reykjavík frá Skrifstofu Reykjavíkurmaraþons Engjavegi 6 í  Laugardal kl. 4:30 að morgni hlaupadags og ekið í Landmannalaugar með smá stoppi á leiðinni í Þjónustumiðstöðinni Hrauneyjum. Ferðin tekur um þrjár og hálfa klst.

Hlaupið hefst við skála Ferðafélags Íslands í Landmannalaugum, laugardaginn 17. júlí 2010 kl. 09:00 og lýkur við skála Farfugla í Húsadal í Þórsmörk.

Af öryggisástæðum þurfa allir þátttakendur að tilkynna sig hjá hlaupstjóra við upphaf hlaupsins í Landmannalaugum. Hlaupið er svo ræst í nokkrum hópum með nokkurra mínútna millibili. Þátttökunúmer segja til um hvaða hópi hver tilheyrir. Þetta er gert vegna þrengsla í upphafi hlaups og til að varna því að tíminn líði án þess að hlauparar komist af stað.
 
Hlaupinu er hægt að skipta niður í fjóra hluta:
1. Landmannalaugar - Hrafntinnusker 12 km
2. Hrafntinnusker - Álftavatn 12 km
3. Álftavatn - Emstrur 16 km
4. Emstrur - Þórsmörk 15 km

Við skála Ferðafélags Íslands í Álftavatni þurfa allir þátttakendur að gefa sig fram við skráningarstjóra. Sjá nánar í reglum hlaupsins.