Starfsmenn

Starfsmenn Reykjavíkurmaraþons sjá um stjórnun og skipulag Laugavegshlaupsins. Starfsmenn hlaupsins á  leiðinni eru hlaupahópur frá Selfossi, Frískir Flóamenn, og með þeim björgunarsveitafólk frá Selfossi. Alls eru það fimmtíu menn og konur með fimm fjallabíla sem þjónusta hlaupara á leiðinni.

Starfsmennirnir sjá um drykkjarstöðvar, vísa hlaupurum veginn og skrá hverjir fara hjá við Álftavatn. Einnig mun sami hópur aðstoða hlaupara yfir þær ár sem nauðsynlegt er talið að hjálpar sé þurfi. Þau flytja líka farangur þátttakenda að Bláfjallakvísl. Aðrir starfsmenn staðsettir í Húsadal eru flestir sjálfboðaliðar úr röðum hlaupara auk starfsmanna Íþróttabandalags Reykjavíkur. Læknir og hjúkrunarfræðingur verða staðsett við endamark  í Húsadal.

Þjálfun

Við treystum öllum sem skrá sig til vera í þeirri þjálfun sem til þarf. Þar er átt við hefðbundna maraþonþjálfun auk sérstakrar þjálfunar í fjallgöngu og utanvegahlaupum. Gott er að leita ráða hjá þeim sem hafa farið áður Laugavegshlaupið.

Útbúnaður

Meðalhiti í júlí á Laugaveginum er um 7-8°C. Gera má ráð fyrir að brugðið geti til beggja vona með hitastig og veðurskilyrði. Af fenginni reynslu af veðri í Laugavegshlaupi er mikilvægt að vera vel búinn og fara að fyrirmælum hlaupstjóra varðandi klæðnað. Á 55 km leið í kulda og bleytu getur kæling orðið lífshættuleg.

Fatnaður fer eftir því hvernig viðrar þegar hlaupið fer fram. Allir þátttakendur þurfa að vera viðbúnir því við upphaf hlaups að klæðast eða taka með sér auka fatnað í hlaupið, verði þess krafist af hlaupstjóra. Hér er um að ræða síðerma peysu, vindjakka, síðar buxur, vettlinga, húfu sem nær yfir eyru og skjól fyrir háls.

Æskilegt er að hlaupaskór séu með grófum sóla og búið að hlaupa þá til þannig að ekki verði hætta á blöðrum. Vatnsvarðir skór eru taldir góðir en sumir þeirra halda vatni frekari inn (í skónum) frekar en úti. Lágar legghlífar eru góðar til að hindra að snjór og möl komist ofan í skóna.

Næring

Þó að drykkjarstöðvar séu á leiðinni er nauðsynlegt að hver og einn hafi meðferðis drykkjarbrúsa og orkugel eða aðra næringu.

Að hætta á miðri leið

Þeir hlauparar sem koma að skála Ferðafélags Íslands í Álftavatni eftir 4 klukkutíma eða í Emstrum (Botnum) eftir 6 klukkutíma eða síðar verða að hætta í hlaupinu og verður þeim ekið þaðan á Hvolsvöll. Þar verður boðið upp á mat og húsaskjól. Frá Hvolsvelli verður þátttakendum ekið til Reykjavíkur. Þess skal getið að ferðalagið frá Álftavatni og Emstrum að Hvolsvelli getur tekið 2-3 klst og bið á Hvolsvelli getur varað í nokkrar klukkustundir.

Laugvegshlaup er 55 km og því er gengið út frá því að þátttakendur hafi þjálfað sig fyrir þá vegalengd og með skráningu skuldbinda þeir sig til að fara alla leið. Það er ekki í boði að hætta við á leiðinni nema viðkomandi sé veikur eða slasaður. Í Emstrum má þó hætta hlaupi ef þátttakandi nær ekki þeim tímamörkum sem reglur segja til um. Að flytja þátttakendur með bíl á milli skála er tímafrekt og eingöngu hugsað sem neyðaraðstoð. Þau sem neyðast til þess að hætta á miðri leið verða að gefa sig fram við starfsmann hlaupsins. Þetta er mjög mikilvægt því annars getum við átt á hættu að einhver sé álitinn týndur og því viljum við fyrir alla muni komast hjá.