Eins og flestum er kunnugt féll talsverð aska frá eldgosinu í Eyjafjallajökli á hlaupaleið Laugavegsins. Öskulag þekur alla leiðina frá Landmannlaugum að Emstrum og í Húsadal. Ekki hefur rignt á svæðinu eins og vonast var til. Þrátt fyrir að það liggi ekki fyrir hvaða áhrif aska hafi nákvæmlega á öndunarfæri og heilsu eru allir sammála sem hafa lent í henni að þau séu slæm. Verið er að meta ástand á svæðinu öllu þessa dagana. Ef ástand breytist ekki næstu daga sjáum við fram á að þurfa að aflýsa Laugavegshlaupinu.

Þetta þarf þó ekki að þýða að margra mánaða þjálfun sé til einskis. Ný hlaupaleið er í undirbúningi fyrir skráða þátttakendur Laugavegshlaups 2010. Leiðin er ennþá í skoðun og er verið að leita leyfis hjá landeigendum og þeim sem eiga hlut að máli.

Ákvörðun mótshaldara um hvort Laugavegshlaupi verði aflýst verður tekin í næstu viku og þá vonandi um leið, verður hægt að upplýsa um varaleiðina. Ef Laugavegshlaupi verður aflýst þarf hver og einn þátttakandi að ákveða hvað hann vill gera og svara því hvort hann vilji vera þátttakandi á nýrri leið eða hætta alfarið við.

Í skilmálum sem hlauparar samþykkja við skráningu í Laugavegshlaupið segir að ef mótshaldari felli niður hlaupið vegna náttúruhamfara, sem ástand okkar í dag flokkast undir, er ekki skylt að endurgreiða neitt. Þrátt fyrir það höfum við ákveðið að koma til móts við skráða þátttakendur eins og kostur er og endurgreiða 50% af þátttökugjaldi til þeirra sem skrá sig úr hlaupinu innan tilskilins tíma, burtséð frá reglum um náttúruhamfarir.

Næsta tilkynning um stöðu mála berst 16. júní næstkomandi.